भाइरल युट्युबर शर्मिला वाइबा पक्राउ परेकी छिन् । उनलाई बुधबार सिन्धुपाल्चोकको बाह्रबिसेबाट पक्राउ गरिएको हो । काठमाडौं प्रहरी परिसरले उनलाई पक्राउ गर्न सहयोग मागेपछि उनलाई पक्राउ गरिएको सिन्धुपाल्चोकका एसपी सन्तोष खड्काले जानकारी दिए । उनले भने, ‘हामीले पक्राउ गरी उनलाई काठमाडौं पठाएका छौँ ।’ 

प्रहरीका अनुसार कलाकार पवन खतिवडा ‘म्याकुरी’ ले दिएको उजुरीका आधारमा उनलाई पक्राउ गरिएको हो । कुटपिट तथा अंगभगमा उनमाथि खतिवडाले उजुरी दिएका थिए । केही दिनअगाडि वाइबाले म्याकुरीकी श्रीमती सुन्निमा खालिङसँगको अन्तर्वार्ता युट्युबमा सार्वजनिक गरी म्याकुरी र खालिङबीचको झगडालाई बाहिर ल्याएकी थिइन् । त्यसपछि म्याकुरीले पत्रकार सम्मेलन गरी आफूमाथि वाइबाले कुटपिट गरेको सार्वजनिक गरेका थिए ।