राष्ट्रिय स्वतन्त्र पार्टीको सचिवालय बैठकले समसामयिक राजनीतिक घटनाक्रमका सम्बन्धमा तत्काल आइपर्ने निर्णय गर्ने अधिकार पार्टी सभापति रवि लामिछानेलाई दिएको छ ।

अहिलेको सत्ता गठबन्धनमा तीब्र अविश्वास बढेसँगै आइतबार नयाँ गठबन्धनको तयारीमा एमाले र माओवादी केन्द्रले छलफल गरेका थिए । त्यसमा रास्वपाका रवि लामिछाने र जसपाका उपेन्द्र यादव पनि सहभागी थिए ।

त्यसैको तयारीस्वरुप रास्वपाले लामिछानेलाई निर्णय गर्ने अधिकार दिएको हो । यसलाई गठबन्धन परिवर्तनको संकेतका रूपमा हेरिएको छ ।

यस्तै आजै एमाले र माओवादी केन्द्रले पनि पार्टीको पदाधिकारी बैठक राखेका छन् भने जसपाको पनि बैठक बस्दैछ । सम्भवतः आजै नयाँ गठबन्धन घोषणा हुने तयारीका बीच रास्वपाले लामिछानेलाई निर्णय गर्ने अधिकार दिएको हो ।

बैठकमा लामिछानेले समसामयिक राजनीतिक घटनाक्रमका बारेमा ब्रिफिङ गरेका बैठकमा सहभागी रास्वपाका एक नेताले जानकारी दिए ।