सन् २०२७ को एकदिवसीय विश्वकप क्रिकेटमा सहभागिताका लागि प्रवेशद्वारका रुपमा रहेको आईसीसी विश्वकप क्रिकेट लिग–२ को पहिलो त्रिकोणीय सिरिज सकिँदा नेपालको प्रदर्शन निराशाजनक भएको छ । आइतबार सिरिजको अन्तिम खेलमा नेपाल नेदरल्यान्ड्ससँग आठ विकेटले पराजित भएसँदै सिरिज टुंगिएको छ ।

नेपालले लिगको पहिलो सिरिज आफ्नो घरेलु मैदानमा खेल्ने अवसर पाएको थियो । यो त्यहि पिच थियो, जहाँ अघिल्लोपटक लिग २ का अन्तिम १२ खेलमध्ये ११ खेलमा विजयी हुँदा नेपालले ८ खेल खेलेको थियो । र कीर्तिपुर मैदानमा नेपालले लगातार १४ ओडीआई जितेको कीर्तिमान कायम गरेको थियो । तर, योपटक लिगको पहिलो सिरिजमा नेपाल एक मात्र खेल जित्न सफल भयो । 

नामिबिया र नेदरल्यान्ड्ससमेत सहभागी सिरिजको पहिलो खेलमा नेपाल नामिबियासँग ४ विकेटले पराजित हुँदा नेपालले खराब ब्याटिङ गरेको थियो । नामिबियाको बलिङ आक्रमण सामु टिक्न नसकेका नेपाली ब्याटर नेदरल्यान्ड्सको पहिलो खेलमा बाहेक ‘कलर’ मा देखिएनन् । पहिलो खेलमा नेपाल नामिबियाविरुद्ध ४१.१ ओभरमा १३२ रनमा अलआउट भएको थियो । जसमा सर्वाधिक भीम सार्कीले ४४ रन  बनाएका थिए । 

आफ्नो दोस्रो खेलमा भने नेपालले नेदरल्यान्ड्सलाई ९ विकेटले पराजित गरेको थियो । नेपालले यो सिरिजमा पाएको यो एक मात्र जित थियो । यो खेलमा नेपाल बलिङ र ब्याटिङ दुबैमा चम्केको थियो । जसमा कुशल भुर्तेलले ४ विकेट लिएका थिए भने नेपालका लागि अनिल साह र आसिफ शेखले अर्धशतक बनाएका थिए । 

तेस्रो खेलमा नेपाल नामिबियासँग नेपाल २ विकेटले पराजित भएको थियो । सो खेलमा नेपाल पहिला ब्याटिङ गर्दै १७२ रनमा अलआउट भएको थियो । यो खेलमा ओपनर आसिफ शेखले अर्धशतक बनाएका थिए । 

चौथो खेलमा नेपाल आइतबार नेदरल्यान्ड्सँग पराजित हुँदा नेपालले पहिला ब्याटिङ गर्दा १७२ रन मात्र बनाउन सकेको थियो । यो खेलमा नेपालका लागि कुशल भुर्तेलले अर्धशतक बनाएका थिए । 

खस्किएको ब्याटिङ

विश्वकप क्रिकेट लिग २ को पहिलो सिरिज सुरु हुनुअघि नेपालले क्यानडासँग तीन खेलको ओडीआई सिरिज खेलेको थियो । र सो सिरिज क्लिन स्वीप गरेको थियो । यसै खेलबाट लामो समयपछि अनिल साह टिममा फर्किएका थिए । उनी घरेलु प्रतियोगितामा राम्रो प्रशर्दनपछि राष्ट्रिय टिममा परेका थिए । क्यानडासँगको लिगमा पनि राम्रो खेलेपछि उनले लिग २ सिरिजका सबै खेलमा मौका पाए । 

तर, नेदरल्यान्ड्ससँगको पहिलो खेलमा अर्धशतक बनाउनुबाहेक अन्य खेलमा उनी दोहोरो अंकको स्कोरसम्म पनि पुग्न सकेनन् । नामिबियाँसँगको दोस्रो खेलमा त उनी शून्यमा आउट भए । विस्फोटक अन्दाजमा राष्ट्रिय टिममा कमब्याक गरेका उनको प्रदर्शनमा एकरुपता देखिएन । 

यति मात्र होइन, नेपालको सबैभन्दा भरपर्दो ब्याटरका रुपमा रहेका कप्तान रोहित पौडेलले चारै खेलमा ब्याटबाट प्रभाव देखाउन सकेनन् । क्रिजमा जमिसकेपछि पनि विकेट खेर फाल्ने उनको कमजोरी एक्सपोज यो सिरिजमा भए । उनमा परिपक्वताको कमी स्पष्टै देखियो । 

त्यसो त यो सिरिजमा दुईवटा अर्धशतक बनाएका आसिफ शेखबाहेक कुनै पनि ब्याटर सफल देखिएनन् । जसका कारण नेपालले सिरिजमा हार व्यहोर्नुपरेको हो । नेपालले सिरिजमा गुमाएका तीनवटै खेलमा ब्याटिङ कमजोरी देखिएको थियो । 

खराब पिच 

त्रिवि मैदानको पिच तुलनात्मक रुपमा ब्याटिङ मैत्री मानिन्थ्यो । तर, यो सिरिजमा ठीक उल्टो भयो । सिरिजका सबै ६ खेलमा बलर हाबी देखिए । त्यो पनि स्पीनरहरू । अझ पार्ट टाइम स्पीनर झनै खतरनाक देखिए । यसको मुख्य कारण पिचको अवस्था हो । त्रिविको पिचमा बिहानी समय ब्याटरलाई टिक्नै मुस्किल बन्यो । जसका कारण सिरिजका ६ मध्ये ५ खेलमा पहिला बलिङ गर्ने टिम विजयी भए । 

यसरी पिचले भूमिका खेल्दा टस निर्णायक देखियो । टस जितेर पहिला बलिङ गर्ने अनि जित निकाल्ने सहज फर्मुला पिचका कारण बनेको हो । यो पिचमा पहिलो पारीमा बनेको सर्वाधिक स्कोर २०७ हो । जसलाई नेदरल्यान्ड्सविरुद्ध नामिबियाले सफलतापूर्वक रक्षा पनि गरेको थियो । यो मात्र एक खेल थियो जसमा टस हारेर पहिला ब्याटिङ गरेको टिम विजयी भएको थियो । 

दूर्भाग्य नै भन्नुपर्छ नेपालले आफ्ना चारमध्ये तीन खेलमा टस हार्‍यो र खेल पनि हार्‍यो । टस जितेको एक मात्र खेलमा नेपालले नेदरल्यान्ड्सलाई पराजित गरेको थियो । घरेलु टिमलाई नै घाटा हुनेगरी पिच तयार भएका कारण नेपालले घरेलु दर्शकका अगाडि फाइदा उठाउन सकेन । जसका कारण ८ टिम सहभागी लिगको शीर्ष चारमा पर्दै ओडीआई मान्यता कायम राख्ने र विश्वकप छनोट खेल्ने यात्रा नेपालका लागि कठिन बनेको छ । 

लिगमा नेपाल, क्यानडा, नेदरल्यान्ड्स, नामिबिया, स्कटल्यान्ड्स, यूएई, ओमान र अमेरिका छन् । यी ८ टिममध्ये नामिबिया, नेदरल्यान्ड्स्, स्कटल्यान्ड्स, यूएई र ओमान बलिया टिम हुन् । अघिल्लोपटकको लिग स्कटल्यान्ड्सले जितेको थियो भने ओमान उपविजेता बनेको थियो । नेदरल्यान्ड्स भने अघिल्लोपटक आईसीसीका पूर्ण सदस्यहरूले खेल्ने सुपर लिगमा थियो । यसपटक उ लिग २ मा आएको छ ।