२७ माघमा सोनाम ल्होछारको दिनमा प्रधानमन्त्री पुष्पकमल दाहाल प्रचण्डले मन्त्रिपरिषद् पुनर्गठन गर्ने र तामाङ समुदायबाट मन्त्री नियुक्त गर्ने बताएका थिए । कांग्रेससँगको सहकार्यमा माओवादीबाट कुनै मन्त्रीको सिट खाली रहेमा त्यसमा स्थायी समिति सदस्य तथा सांसद हितबहादुर तामाङलाई मन्त्री बनाउन चाहन्थे ।

तत्कालीन माओवादी महासचिव पोष्टबहादुर बोगटीको निधनपछि बागमती र नुवाकोटबाट केन्द्रमा प्रभाव राख्ने माओवादी नेता हुन् तामाङ । सशस्त्र द्वन्द्वताका काठमाडौंको उत्तरी क्षेत्र र नुवाकोटको दक्षिणी क्षेत्रमा खटिएका थिए तामाङ । पार्टीभित्र गोप्यता राख्ने र संगठनप्रति दृढ रहेका उनी झलनाथ खनालको पालामा १३ दिने खेलकुदमन्त्री बनेका थिए । तामाङ समुदायबाट पनि एक जना सदस्यलाई मन्त्री बनाउन प्रचण्डलाई पार्टीभित्रबाट दबाब थियो । त्यो दबाबको सार्वजनिक ठाउँबाट २७ माघमा जवाफ दिएका थिए ।

उता, जिल्लामा पनि उनीपछिको नेतृत्व लिन जिल्लामा प्रतिस्पर्धा छ । नुवाकोटमा रहेर राजनीति गरिरहेका माओवादी नेताहरूले काठमाडौंलाई आधार बनाएर राजनीति गरेका नेताहरूलाई सहजै स्वीकार गर्दैनन् । २०३६ सालदेखि कम्युनिस्ट राजनीतिमा लागेका तामाङ जिल्लामा सिनियर नेताहरूमध्येमा पर्छन् । 

४ मंसिरको चुनावमा तामाङ नुवाकोट १ बाट प्रतिनिधिसभा सदस्यमा निर्वाचित भएका थिए ।  तामाङलाई मन्त्री बनाएर अर्को चुनावमा यो क्षेत्रबाट माओवादी केन्द्रले एक्लै चुनाव जित्ने वातावरण बनाउन चाहन्छन् प्रचण्ड । यो क्षेत्रमा कांग्रेसको वर्चस्व छ । मन्त्री भएर आफ्नो क्षेत्रमा देखिने खालका काम गर्न चाहन्छन्, तामाङ पनि । एमाले पनि कमजोर देखिएको जिल्लामा कम्युनिस्ट वर्चस्व बढाउन र कांग्रेसलाई काउन्टर दिने प्रचण्डको रणनीति छ । 

पूर्वअर्थमन्त्री प्रकाशशरण महतले नुवाकोट १ बाट प्रत्यक्ष चुनाव जित्ने चाहनाबमोजिम रणनीतिक आयोजनाहरूमा बजेट खन्याएका थिए । अब उनले बजेट खन्याएका योजनाहरूका काम सम्पन्न गर्ने र ठेक्का लगाउने काम गरे भनेर क्रेडिट लिने ठाउँमा पुगेका छन् तामाङ । जिल्लाको रणनीतिक सडक पासाङ ल्हामु राजमार्ग १२ वर्षदेखि अलपत्र छ । त्यसमा स्रोत सुनिश्चित गरेको भनेर महतले भनेका छन् । त्यसमा तामाङको पनि दाबी छ । 

अर्को टोखा छहरे सडक खण्डको स्तरोन्नतिमा परियोजना लगेर सर्भे गर्न लगाएका थिए तामाङले । उनको सो सर्भे गर्ने काममा पञ्चकन्या गाउँपालिका अध्यक्ष तेजबहादुर तामाङले शिवपुरीबाट गाउँपालिका केन्द्रसम्म भर्खर ट्र्याक खुलेको बाटोमा पिच बाटोको टेण्डर पारे । तामाङ बहुल क्षेत्र भएकाले तेजले सो परियोजनाबाट पछिल्लो संघीय चुनावमा भोट आउने आश्वासन दिएका थिए । त्यसपछि दुवै परियोजनामा आफ्नो प्रभावले निर्माण भएको क्रेडिट लिन तामाङ चाहन्छन् । जिल्लामा निर्माणधीन केन्द्रीय कारागार, २०७२ सालको भूकम्पबाट क्षति भएको नुवाकोट दरबारको पुन: निर्माण, तादी र लिखु जलाधार क्षेत्रमा सिँचाइ, पालिका जोड्ने ग्रामीण सडक स्तरोन्नति, पर्यटन प्रवर्द्धनमा काम गरेर जनताको हितमा काम गर्ने भन्ने देखाउन चाहन्छन् तामाङ । 

जिल्लामा पनि तामाङ जातिवादी भएको आरोप लाग्ने  गर्छ । पार्टीमा योगदान गरेको तर अवसर नपाएको, प्रचण्डले जे भन्यो त्यही मानेर जिल्ला र स्थानीय तहको संगठनको माग सम्बोधन नगरेको आरोप तामाङमाथि छ । अब उनले यो आरोपको जवाफ उनले कार्यसम्पादनबाट दिनुपर्नेछ । 

२०८० सालको संघीय चुनावमा माओवादीबाट टिकटका लागि हितबहादुरका लागि चुनौती दिन सक्ने पात्र तेज नै थिए । पार्टीमा त्याग गरे पनि बलियो पद नपाएको र पब्लिक इमेजमा काम गर्न सक्ने नेताको छवि नबनिसकेका कारणले हितबहादुरलाई काम गर्ने र जनमत प्रभाव पार्ने ठाउँमा प्रचण्डले पुर्‍याउन चाहन्थे । यस्तोमा २०८४ सालमा कांग्रेसबाट महतले टिकटको दाबी गर्न सक्नेछन् । २०७९ को चुनावमा पनि नुवाकोट १ मा टिकट बाँड्न सकस भएको थियो ।